ಹೊಕ್ಕಳ ಹಳೆನೋವಿಗೆ ಒಳಗೆ ಬೇಯುತ್ತಾ..

ಪ್ಯಾಂಟಿನೊಳಕ್ಕೆ ಕಾಲತೂರಿಸಿ

ಬಕಲ್ಲು ಬಿಗಿದು

ಕ್ರಾಪು ತೀಡಿ

ಹೆಚ್ಚೆಂದರೆ ಮುಖಕ್ಕೆ ನಾಕು ಹನಿ ನೀರು

ಯಾರಾದರೂ ಹೇಳಬಲ್ಲರೇ

ಏನೋ ನಡೆದಿರಬಹುದೆಂದು

ನಿನ್ನ ಕಂಡು..?

ತಲೆಯಿಂದ ಮಿಂದೆದ್ದು

ಪಿನ್ನು, ಬಾಚಣಿಗೆ, ಪೌಡರು, ಕ್ರೀಮು

ಉಟ್ಟಸೀರೆಯ ಒಪ್ಪಮಾಡಿ

ಏನಮಾಡಿದರೇನು

ಮರೆಸದಾದೆ ನಾನು

ನುಡಿಯುವುದು ನನ್ನ ಇರುವಿಕೆಯೇ ಸಾಕ್ಷಿ!

ಹೇಳಿಬಿಟ್ಟೆ ನೀನು

ಈಗ ಕಷ್ಟವಲ್ಲವಲ್ಲವಂತೆ

ಮಾತ್ರೆಯಲೇ ಕರಗಿಸಿಬಿಡುತ್ತಾರೆ..

ನಿನಗೇನೋ ಗೊತ್ತು

ಬಳೆಶಾಪಿನಿಂದ ಕೊಂಡ ಕರಿಮಣಿ ಸರ

ನನ್ನ ಮಾನ ಉಳಿಸಿದೆ ಎಂದು..?

ಪಕ್ಕದಲಿ ಕೂತ ಮೂರುತಿಂಗಳ ಹಸಿಬಾಣಂತಿ ಕೇಳುತಾಳೆ

ಏನಾಗಿದೆ ನಿಮಗೆ.. ಚೆಕ್ಅಪ್ಪಿಗಾ..?

ಚೆಕ್ಅಪ್ ಮಾಡಲೇನೂ ಉಳಿದಿಲ್ಲ

ಇದ್ದದ್ದ ಬಸಿದುಬಿಡಲು ಬಂದಿದ್ದೇನೆಂದು

ಹೇಗೋ ಹೇಳಲಿ ನಾನವಳಿಗೆ

ಆಸ್ಪತ್ರೆಗೆ ಸೇರಿದರೆ

ಜನಬಂದು ನೋಡುತ್ತಾರೆ..

ಹಣ್ಣು-ಬೊಕ್ಕೆ ತರುತ್ತಾರೆ

ಆಸೆಯಾಗುತ್ತದೆ ಪಕ್ಕದ ಬೆಡ್ಡಿನವರ ಕಂಡು

ಸಧ್ಯ ಆಸೆ ಒತ್ತಟ್ಟಿಗಿರಲಿ

ಪೀಡೆಕಳೆದರೆ ಸಾಕು

ಎನ್ನುವ ನಿನ್ನ ಬೆಂಕಿ ಉಗುಳುವ ಕಣ್ಣು

ನೆನಪಿಸಿದವು ಅಂದು ರಮಿಸಿದವ ಇವನಾ..?

ದೇಹದ ಗಾಯ ಮಾಯೀತು

ಮತ್ತೆ ಹೂವು ಅರಳೀತು

ನಾನೂ ನಕ್ಕೇನು

ಮುಂದೊಂದು ದಿನ

ಹೊಕ್ಕಳ ಹಳೆನೋವಿಗೆ ಒಳಗೆ ಬೇಯುತ್ತಾ..